吴语协会

 找回密码
 开只户头

扫一扫,访问微社区

QQ登录

只需一步,快速开始

搜索
查看: 4513|回复: 2

说说我自家格故事(九)过年(上)

[复制链接]
发表于 2009-7-26 10:23:15 | 显示全部楼层 |阅读模式
说说我自家格故事(九)

过   年(上)

        过新年,是每家人家格小人一年当中最期盼,最向往格日脚。因为每到过年有新衣裳著,有压岁钿拿,吃格物事也最多,白相格物事也最多。用铜钿也用弗着问大人讨哉,想吃,想白相,想买啥物事,想作啥就作啥,自由自在,真格一点也呒不拘束。对于像伲箇种对“国事、家事”侪弗懂、弗问格小干儿来说,过新年就是一桩最最开心格事体。
       先说说“吃”格物事。我小格辰光,每到过年,吃格物事真是弗少,有格物事是天热格辰光就准备好仔一直保存到过年晨光再拿出来畀伲吃嘅,譬如:毛豆荚干、笋豆、盐金豆。有格物事是临近过年格辰光陆续买嘅,譬如:各种糖果、长生果、五香豆、瓜子、果肉。还有格物事是过年以前事先准备好仔等到临近过年辰光或者请师傅到屋里来做,或者自家做嘅,譬如:红、白糖年糕、团子。
其实为过年所做格各种准备,一般勒每年格中秋节一过就已经开始哉,譬如,一家大小过年要着格新衣裳,就要勒箇个辰光开始,拿裁缝师傅请到屋里来,摆开仔作台,搭每个人量好尺寸,一针一线格做起来。
       苏州地方格习俗“小雪腌菜,大雪腌肉”。所以,立冬一过,就要为腌制箇种荤素食品做准备:要拿大大小小格缸缸甏甏从角角落落搬出来,小格缸头甏脑要搬到河滩头去,勒河里汏清爽,顶倒过来,戤勒墙脚半边,拿缸、甏里格水合干。等到大青菜、雪里蕻一上市,姆妈就会先买好几十斤盐,再请人拿买好格大青菜、雪里蕻成担承担格挑转来。菜一买转来,亦是汏菜、晾菜、腌菜,一阵忙碌,直到两只可以盛五担水格大缸里格腌菜放满为止。到腌制鱼、肉格辰光,腌好格大鲭鱼、猪蹄膀,差弗多挂满天井二楼东、北两面格窗槛。
       蒸年糕,是过年以前一定要做格一桩大事体。为蒸年糕做格各种准备,差弗多一交腊月(阴历十二月)就开始哉。要做嗝第一桩事体就是买糯米,买黄、白糖。物事买全之后,就是淘米,牵粉。因为糯米多,牵粉就必须要有大格担磨。
       担磨格直径大约有二尺,放勒一只比骨牌杌子稍为高一点格井字形磨床浪向,刚好畀高出磨床面格四只床脚卡煞而弗能移动。磨子格上爿浪有一个有架子固定勒石磨爿浪格硬木条。应募条格两头各有一个套磨担格圆洞。磨担使用两根一握粗细格木棍做成丁字形格架子,为仔增加丁字形格牢固程度,勒两根木棍连接格场化还有斜撑来加固,勒磨担格头浪桩一根可以套勒磨爿横木条圆洞洞里格短木棍。磨担格横档是用粗麻绳吊勒房梁浪,吊格高度也是可以根据推磨人格身高临时调整嘅。
       因为伲自家屋里地方比较小,呒不担磨格场化。所以每年到要牵粉个辰光,总是了隔壁药材店后院格王家里。俚厾屋里有一只三开间个大厅,箇只担磨旧房了俚厾大厅个东面。我总归要跟姆妈一淘去,去仔末主要是帮忙推磨。磨好仔米粉还要用绷筛(苏州白话读作[sy])筛一筛,筛出来格粉头一般会再磨一次,第二次筛出来格粉头可以做粉蒸肉格粉料。当然,糯米粉磨好以后还需要晒,保持干燥,否则是会坏嘅。
       做年糕总归是搭做年糕格师傅预先约好仔日脚,到约定格日脚,年糕师傅会派人拿作台板、蒸笼梯先送过来,勒灶屋间格大镬子浪架好蒸笼,一面就要叫人点火烧水,一面搭好做年糕格作台。买好格黄糖、白糖统统侪要拿出来,先要成功糖油。等年糕师傅一到就开始,年糕师傅先要根据糯米粉格多少,拿熬好格糖油镶白开水稀释,然后洒到糯米粉里。接下来,师傅拿洒过糖水个糯米粉一层一层铺到蒸笼里,让烧火格人望灶膛里添柴,烧旺仔火蒸。
       刚蒸出来格糕叫松糕,放白糖格叫白松糕,放黄糖格叫黄松糕。松糕一蒸出来,伲箇辈登勒旁边等格小人就会伸长仔手问师傅讨松糕吃。年糕师傅一般就会扚(苏州白话读作[tiq],掐;摘)畀伲一人一团格吃起来。剩下来格松糕,是要像北方人做馒头辰光格{扌肉}(苏州白话读作[nioq],揉)面实梗拿松糕{扌肉}实,做成长方条状,再用扎底线一块块切下来。除脱仔做年糕之外,还会用大大小小格碗盏做元宝形状格白糖搭黄糖年高,大大小小格元宝堆叠成功年糕元宝宝塔。做糕师傅通常还会拿切剩下来格糕头分畀伲箇箇辈小干儿吃。做好格年糕可以一直吃到正月半元宵节以后。
       年糕,除脱仔传统格黄糖、白糖年糕外,还有猪油年糕、宁波年糕。黄糖、白糖年糕格吃法,我记得格有限面几种:
       汤煮。勒大年初一、十五格元宵节(也称为“小年”),拿年糕其成功年糕丁,搭糯米粉搓出来格小丸(苏州白话读作[yuan])子一淘加水煮,吃个辰光加白糖。一般作为当日格早餐,也可以作下昼或夜里格点心吃。
       油煎糖年糕。拿年糕切成薄片,勒打好格生鸡蛋里滚一滚,让糖年糕外面裹上一层鸡蛋,放勒镬子里用油煎。也可以勿用鸡蛋。虽吃格人格喜好而定。可以作为早点或待客格点心。
烘年糕。箇是伲小辰光过年里向最欢喜格零食。先拿糖年糕切成功薄片,然后勒炭火浪架一张铁丝网,或者放勒铜格手炉或脚炉盖浪烘烤,烘烤格辰光散发出来格香味真能让人口水欲滴,吃起来也特别格香甜。
       猪油年糕格吃法,一般总是勒打好格鸡蛋里向滚过之后,勒镬子里用油煎来吃。
       宁波年糕,因为磨米粉个辰光是刚淘过后就上磨格带水分格密,所以亦叫水磨年糕,蒸好格松糕要勒石臼里用大木榔头充分捶打之后,作成条状,年糕格本身是呒不味道嘅。宁波年糕通常侪是从食品店买转来嘅。吃法有炒、汤两种。一般是先切成片,浸勒水里。吃格辰光,再从水里捞出来,沥干水分。应为无论是炒还是煮,味道侪是我非常欢喜吃格咸味。最常见格朝宁波年糕,有:雪里蕻肉丝炒年糕,韭芽肉丝炒年糕,咸菜肉丝炒年糕等。做各种炒年糕格菜侪是先炒好嘅。做汤年糕,上面三种菜虽然也侪可以做,但是韭芽炒肉丝一用汤煮,韭芽就烂脱哉,就会失去韭芽香脆个味道。
       传说腊月廿三,灶家老爷要上天,到玉皇大帝搭报告勒人间一年来格所见所闻,所以,箇日子吃过夜饭之后,家家户户要送灶家老爷上天。
       过去,到腊月廿四格辰光,勒外地工作、经商、读书格人差弗多侪要回转来哉,一家人快快活活勒夜饭是要吃糯米团子嘅。团子格酿有甜、有咸。甜格有:水晶(白唐加猪油)酿、黑芝麻(磨过的黑芝麻加糖)酿、赤豆沙酿、枣泥酿等;咸格有:肉酿、萝蔔丝酿。我小格辰光弗欢喜吃甜格物事嘅。吃廿四夜团子格辰光,我只吃肉酿搭萝蔔丝酿两种团子。我特别欢喜姆妈做格萝蔔丝酿团子。萝蔔是吃起来有点甜味格太湖萝蔔,刨好格萝蔔丝是用红烧肉格卤烧过嘅,所以萝蔔丝酿各味道特别鲜美,是泥屋里向人人侪欢喜格团子。
       春卷,也是过年辰光常吃格一种特色食品,可以当茶食点心来待客。做春卷酿格也是是先炒好格菜肴,常用格有韭芽肉丝、白菜肉丝、雪里蕻肉丝、芹菜肉丝等。春卷是用一张张格春卷皮拿浴现钞好格菜包成卷,然后勒镬子里用油煎嘅。
       吃过仔年四夜团子,家家人家侪要开始准备过年。先是掸尘(大扫除)。掸过尘之后,就要拿过年祭祖用格铜香萝蜡钎等器具拿出来揩、汏干净、喜神(祖先)画轴等要挂起来。
腊月格最后一日,称作“大年夜”,也有格场化称“大年三十”。但是,阴历格历法,弗是每年格腊月侪是三十日嘅,有格年份腊月只有廿九日。所以“大年夜”个称呼比较妥帖。大年夜箇日是过年辰光最最忙格一日。从早朗开始就要为一年一次最隆重格祭祖仪式搭一年一次最最丰盛格阖家团圆格家宴(年夜饭)做准备。
       按照旧格礼数,过年辰光箇次祭祖格仪式是非常繁琐嘅。除脱仔点香、烛、上供所有格菜肴外,就是酒水也要敬三巡,搭祖先行礼行格是跪拜大礼。行礼前,勒香案门前先要铺设好几个拜单。拜单其实是一种或圆或方弗规定厚度格棉垫子。行礼格辰光,双膝勒拜单浪跪下去,拱手拜,再叩下头去。按长幼排序,顺次跪拜,行酒三巡,要跪拜三次。因为伲格屋里还算是个书香门第,所以勒浪祭祖格同时还要拿条鲤鱼来放生,算是要鲤鱼跳龙门,让小辈厾能够出人头地嘅。
       接下来是吃年夜饭。我小辰光吃年夜饭,除脱籽勒自家屋里吃之外,还要到我格老寄爷搭去吃,往往是以老寄爷屋里箇顿年夜饭为主。我格老寄爷姓李,是一爿药材店(中药铺)格经理,老寄娘姓高,勒黄埭街东横头安桥堍格东面开一爿豆腐店。两位老人(苏州白话读作[niang])家结仔婚多年,自家一直呒不个儿(苏州白话读作[ni])子。按照旧格礼教,“不孝有三,无后为大”格规矩。已经收养仔一个姓卢人家个二儿子做仔俚厾格养子。还搭我格爷娘讲一定要认我做俚厾格寄儿子。每年过年个辰光还一定要我到俚厾屋里向去吃年夜饭。每年格年初头浪,到老寄爷、老寄娘搭去拜年,还有得拿压岁钿。平常日脚,老寄娘也经常会畀零用铜钿畀我。
发表于 2009-7-30 19:34:01 | 显示全部楼层
问两个字读音~

1.隔壁药材店后院格王家里    王家里的家怎么读啊?ka还是kah?
2.筛一筛,筛出来格粉头一般会再磨一次   筛读sa还是sy?
3.先是掸尘(大扫除)  读toe还是te?
 楼主| 发表于 2009-7-31 11:17:38 | 显示全部楼层
问两个字读音~

1.隔壁药材店后院格王家里    王家里的家怎么读啊?ka还是kah?
2.筛一筛,筛出来格粉头一般会再磨一次   筛读sa还是sy?
3.先是掸尘(大扫除)  读toe还是te? ...
人人头 发表于 2009-7-30 19:34


我格读法是:
1、王家里,读作[wuaqng kaq liq]
2、筛,读作[sa]
3、撣尘,读作[tai tsen]
我格注音可能搭恁厾格有点出入。请指正。
您需要登录后才可以回帖 登录 | 开只户头

本版积分规则

手机版|Archiver|吴语协会 Wu Chinese Society ( 网友言论不代表本站观点 )

GMT+8, 2024-3-29 18:13

Powered by Discuz! X3.4

© 2001-2017 Comsenz Inc.

快速回复 返回顶部 返回列表