吴语协会

 找回密码
 开只户头

扫一扫,访问微社区

QQ登录

只需一步,快速开始

搜索
查看: 4543|回复: 0

说说我自家格故事(十)过年(下)

[复制链接]
发表于 2009-8-11 08:31:36 | 显示全部楼层 |阅读模式
本帖最后由 laosuzhou 于 2009-8-11 08:34 编辑

说说我自家格故事(十

过年(下)

      再来说说过年辰光格白相物事。看戏、听书、搓麻将、推牌九、掷骰子等侪是大人过年辰光格白相事体。我小辰光,小干儿(苏州白话读作[ng苏州白话格])白相格有打弹子、滚铜板、拍洋画、斗飞机、扯铃、放鹞子、戴仔虎脸头子舞刀弄枪等。放鹞子格事体我已经有专文回忆,我就弗勒箇搭噜苏赘述。
      勒十里洋场格上海滩,打斯诺克也叫打弹子,打斯诺克格场化称为“弹子房”。伲小干儿白相格打弹子是完全弗一样嘅。伲格弹子是一种直径大约一厘米左右格玻璃球。白相起来就勒平坦格空地浪。经常白相格打弹子有三种打法:一种叫“进洞”;一种叫“打乌龟壳”;一种叫“冲场弹”。
   “进洞格打法,是勒平坦格烂泥地浪白相嘅。白相起来呒不人数格限止。先勒平地格前半场挖三个浅洞,定好开始线。然后用厾弹子格远近来争先后次序,依据次序格先后从开始线出发打弹子。比哪一个先完成进三个洞。进完三个洞格就是老虎。畀老虎打着就死脱,就淘汰出局,算输。
   “乌龟壳格打法,是勒平地浪划定一个大圆圈,弹子勒圆圈格范围里打,打格辰光要掌握好用力格程度,用力大,弹子就会滚出圆圈范围,箇就算输脱而要出局。畀别人打出圆圈格人也算输脱,也就要出局等待下一盘格开始。直到剩下最后格,就是总赢家。
   “冲场弹,是勒一个比较大格空地浪满场冲来冲去格打弹子。比格是打弹子格力度,是要使自家格弹子搭别人格弹子保持比较远格距离。还有就是比打弹子辰光瞄准准度,瞄得越准,赢格机会就越多。畀别人打着,就算输脱。
      滚铜板也需要一个平坦格场地。白相起来,先用砖头架起一个斜面,铜板从斜面上方落下,铜板顺着斜面滚出去,滚得最远格人就赢得出手格先机,可以先拿起自家格铜板去打别人个铜板,打着格就算输脱。打勿着就要畀别人打,就实梗倷打我,我打倷,剩下来格最后个人就是赢家。
      白相拍洋画格场所必打弹子、滚铜板要多,除脱籽勒地浪向白相外,还可以勒台子浪,甚至大格方凳浪白相。白相格方法是用手拿洋画拍得翻过来。拍洋画是有技巧嘅,技巧主要勒两个方面:一个方面是手拍下去格辰光要有适度格风,风有辰光要大,有辰光要小,箇就要看洋画搭地面(或台、凳格面)之间格紧贴程度,贴得紧密,拍格力度就要大一点,如果贴得勿紧密,拍格力度就要小一点。第二个技巧就是要让洋画搭地面(或台、凳表面)尽量贴得紧些,贴得越紧密,也就越勿容易畀人拍翻。
       我记得,最早出现格“洋画”是上世纪四十年代上海格几爿烟草公司(英美烟草公司、南洋兄弟烟草公司)为仔推销俚厾格香烟,勒包装香烟格辰光,附加勒香烟壳子里向格印制精美格硬纸片。洋画是俚厾聘请仔当代格著名画家,如刘继卣等,根据中国古典名著《三国演义》、《水浒传》等绘制格非常精美人物或情节画。画格反面还有说明绘画内容格文字。五十年代开始,才有根据故事情节绘制格连环图片,并且整张印制勒质量较次硬纸片浪洋画。事实浪,拿来拍格洋画是后一种纸质较差,印制得比较粗糙连环画片。那整张戈画片按照印好格画框中间剪开,一般一整张画片可以剪出五十张小格洋画来。拍洋画就是用剪开格小洋画白相嘅。
       斗飞机。我该搭说格“飞机”,是用纸头褶格“纸飞机”。纸飞机摺起来并弗难,不过已经过去仔半个多世纪哉,哪亨格摺法,我已经弗大记得起来哉。斗格场面倒是像昨日一样,至今仍历历在目而记忆犹新。斗飞机白相起来,两个人拿摺好格飞机放勒台子浪,用嘴吹,使得飞机前进,直到两只飞机碰勒一淘。哪只飞机先翻脱,或者夺勒地下,箇末就算输脱。纸飞机越重,飞机就越勿容易畀对方吹翻。还有就是吹出来个风力越大,就越容易获胜。
       扯铃,南京人叫做“抖嗡”,也就是北方人白相格“空竹”。两根一尺来长格棒,用一条绳子连起来,扯动一只形似葫芦样格竹木做成格物事,箇个物事旋转起来,就会发出“嗡嗡”格响声。有格做成哑铃格样子,两头侪是会发出响声格音盒,扯动“哑铃”,转起来格辰光,发出来格响声更加响。会白相格人还能够做出抛、接、滚动等花样,就像杂技当中格空竹表演一样。
      过年辰光有弗少格卖薄纸板做格关公、张飞、赵子龙、唐僧、孙悟空、猪八戒、沙和尚等人物,以及狮子、老虎等动物形象格虎脸头子、木头做格刀、枪、剑、戟、棍棒等适合小人白相格小摊头。伲箇辈小人勒过年辰光,因为有大人畀格压岁钿,所以身浪总归会有一点铜钿嘅,想买啥物事,只要弗超过能力范围,用铜钿就用弗着去征求大人格意见,是可以自家作主嘅。像我实梗格男小干最欢喜戴仔虎脸头子舞刀弄枪,吓小小干。
       除脱仔箇种小干儿搭小干儿一淘白相格物事之外。过年辰光还会有一些小格走村串乡格马戏杂耍班子到黄埭箇种小场化来,寻一块空格场子,有格围起仔布幕墙,看客要勒门口买仔票进场观看;有格勿用围布幕墙,一摆开场子,敲起锣鼓,就会有人围拢来看俚厾格表演,一面表演武术、杂耍,一面问围观人群讨铜钿;有舞刀弄枪兜售狗皮膏药、跌打损伤要格;有手里牵仔只猢狲,勒空地浪表演猢狲出把戏。箇种场化伲小干儿也经常会去轧闹猛嘅。
      守岁也是过年辰光箇一个重要节目。我小辰光曾经搭爹爹一道守过岁。所谓“守岁”,就是从大年夜箇日夜里一直弗睏觉,等到大年初一格天亮。大人守岁是有准备嘅,伲小人一点准备也呒不,完全是一种好奇搭仔冲动。过去个辰光亦呒不啥个春节联欢晚会来搭倷消磨辰光嘅,所以辰光到仔半夜十二点过后,人就会觉着特别困乏,两只眼睛格上眼皮搭下眼皮一直勒浪打相打,呵欠一个接一个。有辰光也会学仔大人格样子,勒厅堂浪兜兜转,旋旋转,用弗停格踱步来驱赶瞌睡虫。有辰光会嬲牢交仔大人,要大人讲故事,固是个情节也能够驱走伲格睡意嘅。一直要到天亮以后,总是先让伲小人上楼去睏觉。一夜弗睏,人特别疲劳。差弗多一睏到床浪我就呼呼入睡哉。
       大年初一早浪起来,每个小人枕头边浪放好一只果盘。果盘里除脱仔糖果、饼干、毛豆荚干、长生果等吃格物事之外,还有一只放压岁钿格红纸包。早浪格点心是甜食:糕圆,是糖年糕丁搭小糯米圆子一淘煮熟,吃格辰光再加白糖。按照以前格风俗习惯,大年初一是不出门嘅。新年伊始,小人要搭自家格长辈拜年。随便啥人既弗能骂人,亦弗能打人,更加弗可以说弗吉利格闲话。
      年初五是财神菩萨格生日,早浪起来要放炮仗,迎接财神老爷。特别是做生意格人家,因为要求得财神菩萨保佑全年生意兴隆,所以对迎接财神老爷格事体显得格外隆重。
      正月十五,元宵节,也是过年当中格一个蛮重要日脚。除脱仔早浪格早点要吃小元宵汤年糕之外,要举行元宵灯会、闹元宵。所以元宵节也是一个蛮热闹格日脚。不过元宵节一过,新年也就算过过哉,所有格一切侪恢复得像往常一样:市镇浪格春节集市已经陆续退出;回转去探亲格人也侪回转来哉;大大小小格工厂、商店、作坊也侪要恢复生产、开门营业;乡下头格种田人也要开始田里向生活哉;伲箇辈读书格小干儿,呒不仔脑热格白相场化,只得拿白相得野脱格心收拢转来,去认认真真格读书,等待下一次格过年。
您需要登录后才可以回帖 登录 | 开只户头

本版积分规则

手机版|Archiver|吴语协会 Wu Chinese Society ( 网友言论不代表本站观点 )

GMT+8, 2024-3-29 18:57

Powered by Discuz! X3.4

© 2001-2017 Comsenz Inc.

快速回复 返回顶部 返回列表