吴语协会

标题: 说说我自家格故事（二） [打印本页]

作者: laosuzhou 时间: 2009-6-22 09:12
标题: 说说我自家格故事（二）
本帖最后由 laosuzhou 于 2009-7-2 23:12 编辑

说说我自家格故事（二）

小辰光，人家叫我“小瘌痢”

自从助我出生格“老娘”拿我从阳罗王手里夺转来自之后，因为自家格亲生姆妈格奶水勿够，我格爹爹就托人搭我寻奶奶娘。从此以后我就吃奶奶娘格奶，我先后吃过两个奶奶娘格奶，一直吃到两岁多方才断脱人奶。
我从出世以后，只有三个月大格辰光，湿气（也叫“胎毒”。现在医学浪称“小儿湿疹”）就开始发出来哉。郎中先生（以前民间称“中医师”为“郎中先生”）说，小囡格湿气是勒娘胎里积下来格度，所以也叫“胎毒”。胎毒是娘勒浪怀胎格辰光，鱼腥虾蟹吃得忒多格原因，所以说胎毒湿气是小人生出来格辰光从娘肚皮里带出来嘅。刚刚生出来格小干侪有胎毒嘅，只不过有格多点，有格少点。为啥小囡身体里格胎毒湿气先勒头浪法呢？因为刚生格小人头顶浪格囟门还朆长好，就像门窗朆关上。小囡身体里格毒气是朝上走嘅，就从头顶浪箇个朆长好格囟门里钻出来，所以，小囡格胎毒湿气侪是从头浪朗先开始发出来嘅。
就像郎中先生说格一样，我格湿气先是从头浪、面孔浪一粒一粒个发出来。一痒，我就用小手搔（读作“蚤”，抓），一搔，就会出淂滋滋，黄啦啦格㾔（读作“滋”）水，㾔水一干，就结一个硬盖。因盖一剥，连头发也拉脱。箇种淂滋滋、黄啦啦格㾔水亦从头皮里滋出来。小手浪搨着箇种㾔水以后，小手摸到哪搭，就滥到哪搭，滥到哪搭，湿气就发到哪搭。慢慢交一粒变一块，一块变一摊，越（苏州话读作“亦”）生越多，直到满头满脸侪生满箇种胎毒湿气，头浪一跟头发也呒步，就像头浪长满仔疥疮，头发一根也勿长格瘌痢头一样。因为我还小，所以大家侪叫我“小瘌痢”。其实，还勿单单“小瘌痢”一种称呼，还有人叫我“小瘌子”、“瘌痢头”、“瘌壳秃”、“瘌痋筋”、“瘌浮尸”……一直到我头浪格湿气完全好仔之后，兄弟姊妹之间一有点口角，俚厾就会实梗叫我。箇个晨光，伲爹爹、姆妈就会立勒我箇面，派俚厾格弗是。
小辰光勿懂，一直以为自家头浪、面孔浪生格搭因为生活习惯无好，干净龌龊勿分而生疥疮引起格瘌痢头是一样嘅，后来进仔中学，上生理卫生课浪先生一讲，方始明白，原来我格胎毒湿气，搭沾染疥癣虫后帐疥疮应起格毛发勿生格瘌痢头，勒本质浪是完全勿同嘅：胎毒湿气是国民性格病毒病，而因疥癣勿愈而造成格瘌痢是皮肤寄生虫病。
按照现代医学格说法，皮肤寄生虫病，只要改变生活习惯，注意清洁卫生，是完全可以避免格。所以勒现在格社会浪，生瘌痢头格人基本浪已经看勿见哉。但是，生湿疹格小干儿，仍旧是屡见不鲜格。而且，身浪湿疹严重格小人，常常属于过敏性体质类型。如果成长过程当中，调养得勿好，就会出现另外一些过敏性格疾病。假使再得勿到重视，勿好好交格护理，有格疾病就可能伴随箇个小人格一生一世。我头浪格湿疹从三、四岁开始就逐渐消退了，但是另一种过敏性疾病却伴随仔我一生。

作者: cqdanielzh 时间: 2009-6-22 11:10
未知先生的文章是文白并用还是纯白话。我看到“生”、“长”并用（“长”更多一点），不知口语里是否也如此。
再问，吴语里（北吴、南吴）有没有说“自个”的？

作者: dorp 时间: 2009-6-22 12:03
自個，本地(台州片)一般拿來表示“自己的”。

作者: cqdanielzh 时间: 2009-6-22 13:03
3# dorp 谢谢。
提此问是因为严州话（大同）只说“自个”，想知道有否相同的。
你自个弗小心＝（怪）你自己不小心。
格是汝自个格事干＝这是你自己的事情。

作者: 人人头 时间: 2009-6-22 19:25
4# cqdanielzh

北吴一般说“自家”，个的古音就是ka

作者: laosuzhou 时间: 2009-6-22 20:03

未知先生的文章是文白并用还是纯白话。我看到“生”、“长”并用（“长”更多一点），不知口语里是否也如此。
再问，吴语里（北吴、南吴）有没有说“自个”的？ ...
cqdanielzh 发表于 2009-6-22 11:10

苏州旁边格无锡、常州等地有实梗格说法嘅。

作者: laosuzhou 时间: 2009-7-2 23:24

未知先生的文章是文白并用还是纯白话。我看到“生”、“长”并用（“长”更多一点），不知口语里是否也如此。
cqdanielzh 发表于 2009-6-22 11:10

写实梗格物事勿可能用纯苏州白话来写嘅，就像过去格吴方言小说实梗。“生”、“长”两个字，勒苏州白话当中是并用嘅。应该弗存在文、白之分。

欢迎光临吴语协会 (https://www.wu-chinese.com/bbs/)