吴语协会

标题: 说说我自家格故事（六） [打印本页]

作者: laosuzhou 时间: 2009-6-29 09:56
标题: 说说我自家格故事（六）

说说我自家格故事（六）

捉瑞蝍

蟋蟀，苏州人称之为“瑞蝍”。其实，要写瑞蝍，可以说，呒不哪个人可以超得过清代格蒲松龄勒《聊斋志异》箇篇《促织》里向对瑞蝍描写格箇实梗（“箇实梗”三字勒苏州闲话里常常连读成“箇长”，意思是那样）精彩而且生动。瑞蝍搭叫哥哥（即蝈蝈）、纺织娘、蝍铃子（即金铃子）、金钟、墨铃等会鸣叫格直翅目昆虫一淘，畀古人归入可供玩赏的鸣虫类。瑞蝍除了有宏亮鸣叫声之外，俚厾还喜好打斗，所以古代亦称俚厾为“将军虫”。干格瑞蝍虫体还是中医格一味功效卓著格利尿中药，可医治水肿、小便不通等病症。
也因为瑞蝍格好斗习性，可以说呒不哪个男小干勿欢喜看斗瑞蝍嘅。要想看斗瑞蝍，就要到野田爿里向去捉瑞蝍。
我小学格同学，广为，搭我同岁。捉瑞蝍，我搭俚是最好格搭档，有辰光也会有其他同学或邻居屋里箇小朋友一淘加入。因为瑞蝍发育成熟勒浪立秋以后，箇辰光仍旧还是暑假假期，所以伲大多数辰光还会带仔自家格兄弟一淘去。伲捉瑞蝍，一般总归勒下昼里。一吃好中饭，碗筷一放，嘴巴一揩，搭姆妈说一声：“姆妈，伲出去白相咋！”
“勒外头好好交啊，覅去打相打！也覅到河滩头去！”姆妈照例会叮嘱我几句，“看好自家格弟弟，覅只顾自家白相！”
“晓得哉！伲是去捉瑞蝍，亦勿是去捉鱼，恁厾放心末哉！”一面嘴里答应，一面拉牢仔兄弟格手，头也勿回格拔脚朝大门外飞快格跑去。
出去捉瑞蝍之前，总归要先勒广为厾屋里向碰头，做出发前格准备。广为厾屋里就勒芳桥下塘，离伲屋里勿远，跑过就勒伲门口格顶芳桥，再往东转个弯，顶多早跑出十公尺格距离就到哉。
捉瑞蝍，也勿是说捉就能够捉着瑞蝍嘅。捉瑞蝍要有一套捉瑞蝍格工具：用细格紫铜丝编起来格有柄格钟形瑞蝍罩。箇是因为对捉着格瑞蝍要求非常高，勿能出现断须（即瑞蝍头浪格丝状触角）、断枪（瑞蝍屁股浪格尾须）格伤残形象，更勿可以短少腿脚，要做到箇点，捉瑞蝍是勿能用手直接去捉嘅，一定要用瑞蝍罩去罩。捉着格瑞蝍要有装瑞蝍格家生。一般是一根或几根一头带节格细竹管筒，竹筒浪要用小锯（苏州话里读[ke该]）子截出距离大致相等格缝来，插上随时可以抽插格铁皮或者硬纸板，拿竹管筒隔成一个个小隔间来放捉着格瑞蝍。竹管筒装满之后，还可以用纸头做成纸管来装瑞蝍。
捉瑞蝍格辰光还要有点点小格技巧。一般是静听、辨别野田爿里各种虫鸣格叫声：“嘘呖呖、嘘呖呖”格叫声，是油葫芦；“唧、唧、唧”格叫声，是棺材头，虽然也是瑞蝍格一种，但是捉着仔一看，俚格头格前端像正面看格棺材，名字就叫“棺材头”，是一定勿能去捉俚嘅，捉瑞蝍捉着棺材头是触霉头嘅；瑞蝍格叫声，差勿多侪是“瞿、瞿、瞿”格声音。仔细辨别，叫声还是有些差别嘅：叫声宏亮而勿拖泥带水格瑞蝍长得大些，身体格颜色也会得深些；叫声尖细格，是刚长出翅膀不久格瑞蝍，身体也会显得小些，颜色也稍为浅些。
听见瑞蝍叫格声音，先要辨清方向，然后循着瑞蝍发出叫声格方向一定要轻手轻脚，小心翼翼格去靠近俚。等到吃准仔场化，还勿能马上动手，先要清理周围格杂草。杂草当中有一种名叫“割人藤”格曼生草本植物，藤蔓浪满是锋利格倒刺，只要一勿当心，勒皮肤浪一揦，皮肤浪马上就是一道血印！我就会教伲兄弟哪亨拿俚拉开。等到杂草清理完毕，再拿旁边格乱石头、碎砖头厾开。清出场化以后就要捉哉，用手翻砖头或者石头辰光，为了勿惊动瑞蝍，总是轻手轻脚，小心翼翼，特别翻到最后，一手翻砖头，一手拿好瑞蝍罩，既要聚精会神，亦要眼明手快，一看见瑞蝍，马上就要用瑞蝍罩罩上去。由辰光也会碰着瑞蝍叛勒大石头底下，箇辰光就要两个人或者几个人分工配合，有人去翻石头，有人来捉瑞蝍。有辰光，瑞蝍叛勒毛豆田里，毛豆浪常常会有会螫人格刺毛虫。因为捉瑞蝍箇辰光精神集中，常常顾勿着毛豆浪格刺毛虫，一勿当心就会畀刺毛虫螫着，螫着格场化痛得辣豁豁。
有辰光，勒野田爿里听勿见瑞蝍叫声，我就会用吹口哨格办法模仿瑞蝍格叫声。因为瑞蝍格本性争强好胜，听见有瑞蝍格叫声，也就会一淘鸣叫起来。等周围格瑞蝍一淘叫起来以后，伲再根据俚厾格叫声去捉俚厾。
装瑞蝍格竹管筒、带格纸头做格纸管拆装满瑞蝍之后，捉瑞蝍也就告结束。因为纸管容易畀瑞蝍格“牙齿”咬破，畀瑞蝍逃脱，所以勿能再勒外世多耽搁，必须豪{忄叜}（读作[heao sao臊入声]。尽快；赶快）赶转去。勒回转来格路浪，伲还会采一把瑞蝍草，准备转去仔勒斗瑞蝍箇辰光做掭草用来驱赶瑞蝍。因为广为厾屋里向有勿少养瑞蝍用格瑞蝍盆搭其他各色各样用来饲养瑞蝍格器具。所以回转来也是先回到广为厾屋里。
一回到广为格屋里，广为厾姆妈会叫人端来友情谁个面盆，先让伲汏手。大家格手侪汏干净以后，勒天井里放好一张矮台子，拿空格瑞蝍盆搬到台子浪来。养瑞蝍格盆侪是带盖格瓦盆，有高有矮，瑞蝍盆格外形有圆形、六角形、八角形等。好一点瑞蝍盆是用紫砂做嘅。考校点格紫砂盆外还有装饰图文。再考校一点格是可以畀瑞蝍保温御寒，让俚过冬格套盆。瑞蝍套盆是勒小格瑞蝍盆外头套一只大一点格盆，盆搭盆之间格空档可以填塞棉花、纸头、丝草等，来增加盆格保温效果。
先准备好几只空盆，对捉着格瑞蝍作第一次遴选。箇是先看瑞蝍啊有伤残。拿断须、断枪、缺脱一只后腿格“独脚龙”实梗格伤残虫子先淘汰脱。淘汰下来个伤残瑞蝍大部分拿来喂鸡。假使有人想要，箇末也会送一点畀俚。
对剩下来格，健康完好格瑞蝍，再进行第二次遴选。箇次格所谓遴选，实际浪就是斗瑞蝍箇开始。先数一数还剩几化瑞蝍，根据瑞蝍格多少，或十只一组，或八只一组，分成几组，然后是两只一对，两只一对，让瑞蝍进行比斗。
斗瑞蝍是最精彩对人最有吸引力格辰光。拿两只瑞蝍放进一只瑞蝍盆里，两只瑞蝍之间格打斗也就开始哉。一般情况底下，瑞蝍头浪两条长长格触须会勿停格摆动，俚厾就能够感觉到对方格存在，就会自家慢慢交靠拢。有个辰光也需要人拿瑞蝍草做格掭草，轻轻触碰瑞蝍腹部末端格尾枪，督促俚朝前爬。只要两只瑞蝍格触须一接触，两只瑞蝍就会马上变得兴奋起来，身体奋勇朝前挺，六只脚紧紧抵住瑞蝍盆底，用强大格“牙齿”咬牢对方，奋力进行像两个人摜跤一样格打斗。落败格瑞蝍就会快速逃开，打赢格就会得意格振翅鸣叫报捷。有辰光输格瑞蝍还会畀赢格只瑞蝍一直打到摜出盆外。就实梗瑞蝍一组一组淘汰，挑选出最狠格在进行下一轮格比斗。一轮一轮个优胜劣汰，最后只保留两三枝胜利者，根据特征搭俚厾封个名号：“红头将军”、“黑头大王”、“黑旋风”等等。
一般来讲，瑞蝍格个体大，力气就大，大都就会赢。然而伲曾经捉着过一只灵巧而异常勇猛格瑞蝍，乃覅看里样子小，勿起眼，但是搭比俚大格瑞蝍都起来一点也勿逊色。每当直接咬斗吃仔亏，甚至比大格瑞蝍摜出瑞蝍盆，只要拿俚重新放进盆里，箇只看看勿起眼股瑞蝍，仍旧会拼命打斗，甚至还会用迂回战术去咬对手格脚、尾枪等，直到对手放弃认输，落荒而逃，小瑞蝍便得意格鸣叫报捷。伲因此而畀俚个“常胜将军”格封号。
获胜格瑞蝍是要专门用比较好格瑞蝍盆养起来嘅，伲勒瑞蝍格盆里还要放上一只小型水盂、一只食盂，里向加上干净格水、饭米粒或一小粒水果，畀瑞蝍吃。箇种小型水盂、食盂多为瓷质，有全白色格，也有青白花色格。有辰光，伲还会放一只有三、四厘米长，一厘米宽，两厘米高，两面留空格瓦格小房子，畀瑞蝍勒房子里睏觉。
等到一切侪弄舒齐，辰光也就勿早，差勿多是觇夜快，要吃夜饭格辰光哉。我搭广为，还有俚厾爷娘回头一声，领仔伲兄弟一淘回去。
记得还有一转，九月初，新学期刚刚开学勿久，伲白相格心还朆收拢。箇辰光秋老虎天气格余威尚存，野田爿里瑞蝍格叫声此起彼落，仍旧吸引着伲。因为下晚昼（晚，读作[mei煤]。下午）放学早，就搭广为一道说好，放仔学直接到广为厾屋里，拿仔要用格物事，一淘去捉瑞蝍。哪里晓得，捉仔一歇，勿知勿觉之间，天倒黑下来快哉，伲两家头豪{忄叜}往屋里赶，也顾勿得再斗瑞蝍哉，拿起自家个书包要紧转去。刚踏进屋里，只见爹爹勒直仔面孔，说：“倷放仔夜学到哪搭去嘅？”
我晓得自家错哉，只好嗫嗫嚅嚅格回答；“搭同学一道去捉瑞蝍嘅。”
“捉瑞蝍，捉瑞蝍，瑞蝍捉得来肚皮也勿晓得饿哉！箇末，倷吃瑞蝍则啘，还转来作啥啊！”爹爹说，“走过来！拿手摊勒台子浪！”
伲爹爹只面孔，平常辰光，伲弟兄姊妹侪见俚怕嘅，何况我自家犯仔错，爹爹要责罚我，心里别别跳，本来勿晓得爹爹哪亨来罚我，一听是要打手心，先是眼泪汪汪，豪{忄叜}讨饶：“下转勿敢哉，下转勿敢哉！”
伲姆妈勒旁边帮我说情：“俚已经认错讨饶哉，倷就饶俚箇转吧！覅去敲俚哉。”
“一定勿能饶嘅！敲俚两记，是让俚有点记心！”爹爹说。我一看实梗，只好缩缩试试格挨到爹爹门前，拿手放到台子浪，爹爹举起手里箇根戒尺，勒我手浪敲仔三记。让我用记牢了一条宗旨：白相勿能忘记学习！

作者: 人人头 时间: 2009-6-29 20:26
蛮有意思个小哈里故事~我从小也朆白相过赚绩~

作者: 乌程仔 时间: 2009-6-29 20:29

蛮有意思个小哈里故事~我从小也朆白相过赚绩~
人人头发表于 2009-6-29 20:26

你们小时已经不行了，我小时玩过。

作者: 富春山越 时间: 2009-7-2 20:24
蟋蟀——蝍蛛、斗虮

欢迎光临吴语协会 (https://www.wu-chinese.com/bbs/)