听上海话看上海人

吴人

原帖由 Herbsttag 于 2006-12-1 11:56 发表
"被起诉，被充公，被决定，被通知"

搿星我觉着侪是用“拨”比较适宜

“拨剥夺”感觉勿是顶适宜

实际浪，吴语用个种句式辰光多数要拿动作施与者讲出来，就算是个象征性个“别人家”“人”也要顺点。弗讲动作比较生硬，就像普话腔调直译个。

拨（拉）俚剥夺，一眼问题呒拨。

吴人

原帖由 lieukehli 于 2006-12-1 09:36 发表


会弗会是 呒-着-辣搭 ？

着 好，呒着落，个就是呒来由哉。后头两个字补充音节个作兴。

个种土词汇考弗大清爽。

吴人

原帖由 mandarin 于 2006-12-1 09:35 发表
譬方侬老热爱吴语，尤其对自家个江阴闲话情有独钟（搿么当然hehe），但亦有人弗在乎个呀，侬为啥一定要去扭转伊呢？

情有独钟个种闲话覅讲，我发过关于江阴话个帖子远远弗如苏州话上海话帖子多。文章也多是苏州闲话写个。wiki浪也只写苏州闲话。音档也以洋泾浜闲话为多。所以侬勒浪贼忒嘻嘻“当然hehe”啥？常常自责，对自家个真正个母语关心弗足，吴音小字典搞仔介点辰光还呒拨江阴闲话个。我弗晓得倷啥地方听得来我对江阴闲话“情有独钟”个，倒是由此想着，个星弗做啥事体还讲别人家自我中心“情有独钟”个人，再是真个自我中心心里有鬼（弗是讲mandarin）。

有人弗关心环境，有人关心环境，吴语本质浪弗是我一家头个事体，是族群众人个事体。要侪是倷个种个人自由法，个绿色和平组织派啥用场。倪中国人就是欢喜垃圾到处到荡掼呀~我弗好拿枪指牢侬了开集中营了啥，闲话总也还是好讲个。

生仔癌症讲覅去扭转，倷介超脱，我佩服；不过目前为止我还是俗人，我还想活。

吴人

有人讲我弗是淘浆糊人。
实际浪弗是我弗来事淘浆糊，是有星事体我觉着淘弗得浆糊。偏生有星人就是要勒个问题浪来所谓“淘浆糊”，每趟个模式侪是一样，文言文了官话了，疲于应付。
我还朆开脱到动辄好换个姆妈孛相相个境界。

我对有精英思想士大夫思维个人交关讨厌，个也是事实。

倪江阴人刘半农算得乡土来，整理江阴民歌，还自家模仿作着本江阴民歌集，白话文运动里向也蛮着力个，尚况还是拨鲁迅讲忒士大夫气，注解个《何典》搞着一抹抹个方框，两家头压末落落搞到弗对。个种水平援开刘半农博士还路远百只脚勒浪个，士大夫气末倒重到弗得了个，再有个种骚老子天下头一个，我哪亨会吃得消。

吴人

原帖由 吴人 于 2006-12-1 19:27 发表


着 好，呒着落，个就是呒来由哉。后头两个字补充音节个作兴。

个种土词汇考弗大清爽。

不过 着 dzah 石 zah 我发音两样个。

serynade

"注解个《何典》搞着一抹抹个方框，两家头压末落落搞到弗对。"

吳人解釋解釋

一抹抹 啥意思？
弗对 此地啥意思？

吴人

原帖由 mandarin 于 2006-12-1 11:52 发表

我觉着是语体关系，因为发现比较文，同理，亦可以讲被起诉，被充公，被决定，被通知，被剥夺。。。。文一点，侪可以用“被”，格么“扣分”文伐？觉着文么就用被，弗觉着么就用拨，老简单个事体。文白是只“连续统”，搿里向只有各人欢喜，呒没 ...

倷个语境里向讲 被扣分。倷作老派报告还是唱戏啊？

倷讲各人欢喜，但是讲 人民zenmin 搭 人民 ninmin 人民lenmin 是有主流与绝对非主流之分个。覅想钻个只空子。闲话是社会现象。拿弗准覅寻借口是各人欢喜，弗会讲也覅寻借口是文言。

理论浪，呒拨啥事体弗可能发生个；但小概率事体当主流来讲，怪弗道“我”读wo个江北腔据说变成所谓主流上海话来。

吴人

原帖由 Herbsttag 于 2006-12-1 20:05 发表
"注解个《何典》搞着一抹抹个方框，两家头压末落落搞到弗对。"

吳人解釋解釋

一抹抹 啥意思？
弗对 此地啥意思？

前头一个是“交关”个意思，小干讲个闲话。
弗对末，就是关系破裂。譬如隔壁邻舍相骂过仔弗来去，个末俚笃就是所谓“弗对”哉。

serynade

路远百只脚
骚老子
天下头

搿星儕是江陰言語？

吴人

路远百只脚 应该是比较通用个。
天下 头一 是一个词语。第一 要讲 头一，其余讲 第二 第三。
个应该也是通用个。

骚老子末，倪老子吃醉仔酒immer讲。 实际浪意思就是 北方闲话 个“老子”。吴语个“老子”主要是“父亲”个意思。

嗯，确实侪是江阴闲话里向讲个。

我用个词汇侪是我会讲个闲话里向来个。我弗发明。

serynade

我拿”天下 頭一隻“讀成功“天下頭 一隻”哉
想：天下頭是啥物事

蠻好，學到眼物事

吴人

lieukehli

根据我个观察，拿“我”读wo个江北腔是30岁朝下上海人里向比较多，越小越多，朝上还是ngu多
"弗对" 相当于北语“不对付”
“路远百只脚” 我一般话“远开百只脚”

mandarin

侬么vio火气介大，啥体集中营咯开枪咯调姆妈咯，讲搿种气话有啥开心。我是一点弗动气，晓得侬现在气头浪向，讲出来闲话。。。。 ，放心~~~左耳朵进右耳朵出，我只当呒没听见好了。

但是闲话讲转来，还是侬自家个错。侬勿同意我个思想观念么，尽管讨论好了，勿高兴讨论么只当勿看见亦可以，呒没必要恶语相向，每个人个人格侪是平等个，侬尽管批判我个观念好来，攻击我个“人”啥体奈？阿是啊。我人品再坏，勿等于我观念就一定错误。再讲我介正宗个人，帮我交往过个人侪清爽来西。
讲到我个观念，现在侬是意见交关大，大大好了，但是阿可以请侬冷静眼，瞄准仔搿只观念本身放枪，眼乎准一眼，vio别咧扒拉乱放。侬要是从逻辑浪、道理浪反驳脱搿只观念，让我心服口服，我是老愿意承认错误个。大家侪是讲道理个人。做啥弄得来好像我只能用搿种极端个方式才能对付奈？搿是非常勿礼貌个。侬讲阿对啊？
现在来讲我个观点。我是旁观者，虽然搿恁么，总归亦有自家个看法。大家可以看到，有辰光我个言论有眼自相矛盾，一歇歇么支持方言独立，一歇歇么又反对完全口语化。格么人么就是搿恁呀，观念会得变个呀，侬wtzdj零四年个想法帮现在一样伐啦，，，葛咯讲呀，我mandarin么亦有转变个辰光搿呀。外加老多辰光，搿种转变是自家勿觉着个。讲到底啦，哀有个道理啦，搿答是bbs，弗是电子版个学报，大部分是想着啥讲啥，随意性本生就是老大个。搿是讲闲话个场合决定个。所以么，尽管我发表过自家个看法，但亦勿改变我个逍遥派个态度，塌仔旁观者个身份。好了，现在只t'in下来一只问题：我mandarin阿可以保持搿种身份，啊？搿是老现实个问题，因为旁观者吗，所以我本来就勿在乎本字个写法，勿在乎是否必定只能用吴语，勿在乎官弗官、文弗文，只要自家灌了开心就好。虽然我出于尊重侬个规矩，改用吴语发文，但我始终保留我个看法。老实讲，侬搿做法是老霸道个。如果侬允许我保留搿只身份，格么请侬多发我点“官话券”、“文言券”（文言弗算吴语嘛），当然咯，还有“外文券”。因为有辰光感觉来了，掼出来两只外文亦讲弗定个。
道理么讲到搿答，我觉着应该算讲清爽我个意思了，希望能够排除侬对我个误解。至于是弗是每个受过高等教育个吴人侪要为“江南的明天而奋斗”（此句用报告式读法），弗参与就是根本错误，所以可以对伊冷嘲热讽，搿是另外一只问题。此地弗赘及。好了，最后再问一声，阿可以答应我个请求？
突然发现拿吴语写文章亦老扎劲欧，哈哈。就是年纪倒把，废话多着眼，多多原谅

mandarin

原帖由 lieukehli 于 2006-12-2 00:32 发表
根据我个观察，拿“我”读wo个江北腔是30岁朝下上海人里向比较多，越小越多，朝上还是ngu多
"弗对" 相当于北语“不对付”
“路远百只脚” 我一般话“远开百只脚” ...

上海呒没人讲wo个，再哪恁江北腔亦顶多是u

[ 本帖最后由 mandarin 于 2006-12-2 01:53 编辑 ]

mandarin

原帖由 吴人 于 2006-12-1 19:31 发表

情有独钟个种闲话覅讲，我发过关于江阴话个帖子远远弗如苏州话上海话帖子多。文章也多是苏州闲话写个。wiki浪也只写苏州闲话。音档也以洋泾浜闲话为多。所以侬勒浪贼忒嘻嘻“当然hehe”啥？常常自责，对自家个真正个母语关心弗足，吴音小字典搞仔介点辰光还呒拨江阴闲话个。我弗晓得倷啥地方听得来我对江阴闲话“情有独钟”个，倒是由此想着，个星弗做啥事体还讲别人家自我中心“情有独钟”个人，再是真个自我中心心里有鬼（弗是讲mandarin）。

搿侬想了忒多了，我呒没搿意思。搿只是顺牢文意直接写下来，为仔要矛头指向侬么，葛咯讲了具体眼、生动眼么，多说（seh）一句“江阴闲话”而已。但是想到其实搿个么大家侪晓得，所以特为打只括号，嘲笑自家多讲忒个，hehe是了了笑自家。呒没其他意思，vio多想。假使让侬受到啥伤害个说seh话，我了此地道个歉，是我呒没考虑周全。贼塌兮兮么“讲的很对”（此处报告腔，幽默一记，纯属修辞手法，请勿扣分），蛮符合我了网浪向个表现出个个性特点，呒啥道理，大家开心要紧～～

gojin

原帖由 mandarin 于 2006-12-2 01:52 发表

上海呒没人讲wo个，再哪恁江北腔亦顶多是u

呒没个种绝对个闲话也请少讲。倪小殷同学讲是主流来。

上海乡下底讲ｗｕ个弗是江北腔，讲ｗｏ／ｏ个再是江北腔。

gojin

原帖由 mandarin 于 2006-12-2 01:22 发表
侬么vio火气介大，啥体集中营咯开枪咯调姆妈咯，讲搿种气话有啥开心。我是一点弗动气，晓得侬现在气头浪向，讲出来闲话。。。。 ，放心~~~左耳朵进右耳朵出，我只当呒没听见好了。

但是闲话讲转来，还是侬自家个错。侬勿同意我 ...

我先起头末搭侬淘浆糊只淘到发券扣分为止，本生是一脚弗大敢睬倷个，看倷起劲勒浪末，就难得搭倷淘淘浆糊。

我扣倷分又哪能呢？我要是真个要扣倷分，弗声弗响扣到倷负分也呒啥，何必还发短消息倷（倷是头一个）。倷讲我猛门末，倷先计较倷个一分哉（倷真个欢喜分数个说话１０分１００分也好加拨侬），嘴还要犟，还文言了六朝了（北方人讲，扯什么JBD呢，到底北方人闲话有力道。。。），弗关我个事体。上头讲哉，有星事体我弗淘浆糊。我就是来侬扣脱一分硬劲还要强辞夺理个辰光决定要搭倷订正。个趟试验证明，我老早个策略交关正确，再次证明我搭倷呒浆糊好淘。

说到底，我弗是要反对个只“被扣分”（所以写弗来吴语个朋友覅吓，呵呵），是要反对个种所谓个“淘浆糊”。“全”读成“具”好讲成是叫恢复“古音”，“被”好讲成是“六朝”语，个种“浆糊”，我弗会淘。

还有，倷千万覅“只当呒没听见”，我讲闲话是希望有效果个。假使真个实梗，我搭倷讲闲话还有啥必要呢，还省得得罪人。

倷打出"写几个文言又被扣分"个种物事末，我上来反应估计实质浪是用汉拼输入法辰光就打勒海个，打个辰光思维也是普话个，改着两个词汇，所以扣侬一分，也弗准备搭倷订正。假使实梗有啥弗好承认，硬劲要自圆其说末，我就呒啥好讲哉。我也会个能，毕竟是习惯，一下笔就是普话逻辑，就像所谓个中国英语。我觉着个搭用汉拼输入法个多多少少侪会碰着个种问题，是要串个。不过我末老早爽爽气气承认过哉，我讲上海闲话还会冒出普通话来个，啥人叫我讲上海闲话是用普话翻过去个呢。。。。死要面子活受罪，个种人也交关罪过人个。

倷还是用倷个普话罢，既然介难过末。个点人权还是要讲个，倷有权用倷个母语（呒法，我只好拿倷视同非吴语母语者搭“桑海宁”之列，难末侬也用弗着介难过）。我建议倷末顶好是写文言，讲倷认定个昆曲白。外加弗好有倷所谓“王芳之流”个“恶心”个“苏腔”（我就弄弗泠清哉，个末介讲纯净，上海话末“人人”“被ｂＥ扣分”也来事个，哪了要末上海话是小娘养个）。

好哉，收工。Tschüss~

mandarin

原帖由 wtzdj 于 2006-12-2 02:31 发表


上海乡下底讲ｗｕ个弗是江北腔，讲ｗｏ／ｏ个再是江北腔。

ho yo 赛过倷是老上海一样。。。
侬上海登过几日天啦

mandarin

wtzdj只嘴巴啊。。。哼哼，勿去讲伊，豪骚刷牙齿去罢倷