楼主个回忆,看得我眼泪水嗒嗒滴。倒不是象人家作家写个啥个大时代个英雄事迹所感动,实在是因为楼主所写个小了覅小个事体,就象我亲生经历个一模一洋,而且小晨光个事体记得来得个老,所以心有所动哉!我比楼主小一岁,虽然住了上海徐家汇附近,但是附近也有农田,湖浜,石板桥等等。现在离开生我养我三十几年个土地九千多英哩,而且屋里厢是被强迁特个,再也回不到勒了高头白相个长大个个块烂污泥地皮, 哪能不叫我眼泪水嗒嗒滴......
看了楼主个描写,现在再晓得原来郊区和市区过个日脚呒啥两样,我小晨光穿个也是阿哥穿落来修改个补丁衣裳;吃个也是四分行钿一根个棒冰,不过呒没楼主屋里嘎富有得天天吃,有晨光白棒冰不舍得吃,等有赤头棒冰来个晨光再买来吃;看个是屋山头集体个14寸黑白电视机,居委会个,也是等楼主写个几只电影,对新闻一点也不感兴趣,后来好像80年代初看邻居个12寸黑白的;还有姿三四郎,一个礼拜放一集,一只被包要掼哎呒没掼出去个辰光停老了,请看下集,喔唷,个辰光心里挖是挖煞得来弗得了;76年老毛驾崩个辰光了了学堂里集体看追悼会,人家侪扑了台板郎个哭,我装悲伤了一刻钟还是哭不出,也象楼主一洋觉得自家反动,只好也扑了台板郎呜哩吗哩个假哭,后来想到自家平常被爷吃生活个冤枉事体,就真个哭出来了,乃么好哉哭不停了。记得是王洪文主持个追悼会,王洪文是我小辰光崇拜个对象,后来大学毕业个辰光看了张春桥个文集《龙华集》才晓得原来张春桥个文采嘎灵光,就开始崇拜张春桥了,个是后话,呵呵。倒是一向不欢喜邓小平,记得小学里开笔写个第一篇文章就是批邓个,而且还用毛笔誊好贴出来,反击右倾反案风:"现在全国形势一片大好,有一小撮右派妄图反案, blah, blah..."。再讲廿年前个歇辰光正好大学毕业,大家侪晓得了了做啥个不欢喜邓小平个事体。诶有,楼主写落雪个年份,分毫不差,打雪仗个事体到现在还记得清清爽爽。小辰光没啥东西白相,但是现在觉得侪蛮有劲个,不象现在个小囡要学个物事多是多得来,弄得头头转没空白相,么劲;还有,现在个小囡呒没兄弟姊妹打相打吵相骂,终归好像人格当中缺了点啥。楼主写个上海小学四年纪开始学英文,但是我好像记得三年级就开始学了?勿过上海从小学开始学英文是千正万确个,到了初中课本里又从头开始,到了高中读统一教材再从头开始,当然老师直接从后面开始教,到了大学课本再从头来一遍,撅倒。
罗罗索索也回忆了个眼,不成篇幅,搭楼主个笃笃定定娓娓道来个文字不好比。姑且瞎七搭八瞎写写,大家有看呒看瞎看看算了。 |