本帖最后由 吴言吴语 于 2009-7-6 19:43 编辑
太仓农村里的人,有信佛教格,也有信道教格,宗教观念大都弗那恁﹙怎么﹚强,弗过虚应故事罢哉!必过屋里死忒仔人,总归要请点和尚道士来吹吹打打,闹闹热热;大都数人家是以请道士为主,故所以太仓道士格生意特别好!﹙老话头“蛳螺壳里做道场”、“和尚道士着夜忙”、“至心朝礼,眼睛看勒房里”就是形容格恁梗﹙这样的﹚格情景﹚
笔者三年前到太仓最北格乡下奔丧﹙太仓话叫“喫豆腐”﹚,看见一桩弗可思议格稀奇事体,讲出来畀大家听听:
丧家该日请仔七八个道士吹吹打打,忒﹙替﹚死人发丧,死人已经大殓入棺,搁勒前头﹙太仓话,意思是“堂屋”﹚,外头场浪搭好仔雨棚,格点道士伊特正勒浪有劲搭骨格作法,一歇朝里对仔死人,一歇朝外对仔场浪供格死人牌位,跳上博碌,实在有看头。笔者看看场浪哪恁有两张台子,跑过去一看,一张台子浪供格死人神主牌,格呒啥稀奇,稀奇格是着外头﹙最外面﹚格台子浪供格牌位,一看吓仔一跳,上头是“当今皇上万岁万岁万万岁”十一个墨写大字,一拍鹘里郞头﹙脑袋﹚一想,中国格皇帝呒不仔已经八十几年哉,末代皇帝死忒仔也有四十几年哉,啊来﹙哪里﹚还有皇帝,俚歇该点道士,壳张﹙太仓话“难道”﹚是一百年门前﹙以前﹚来格,看看该几个道士,除忒几件市面浪买格道袍外,搭普通人呒啥两样,想想实在弄弗明白,勒念一世纪格今朝,还有实梗呒法子想通格事体?
附注:这是笔者用纯粹太仓方言写的,大家阿看得懂? |